Bänd

Sven

De Sven hed scho als chline Bueb sini Liebi zur Musig entdeckt, will sin Vater i verschidene Bänds gspillt hed. Mit 8i hed er scho i Chinderchöör mitgmacht und hed au Solouftritt gha. Mit 16ni hed er sini erscht Bänd gründet und hed 2 Johr spööter mit dere 2 Wuche lang uf Mallorca a diverse Partys gspillt. De Sven hed öppe 64 eigni Songs gschribe wo uf 3 CDs cho sind. Mit de Bänd 041 isch er 4 Johr mit sine eigne Songs dur d Schwiiz tourt. Sin absolut gröscht Uftritt isch im MGM Hotel in Las Vegas als Elvis-Imitator gsi. Mit sine Söhn Björn und Lars hed er 2005 d Familieband Kalbifamily gründet mit ihre 2 CDs ufgnah und a diverse Fescht und Openairs gspillt hed. 2010 hed er mit em Renato Carretti d Bänd The Taperets gründet für a Zahnärztekongresse z spiele. Wills det so Erfolg gha händ, hets au öffentlichi Uftritt demit gäh. Im Summer 2015 isch Luke’s Groove Band mit The Taperets für einigi Uftritt fusioniert. Mit em Leadsänger Sven isch wäg de mächtige Stimm näbe Klassik-Rock au Soul und Blues gspillt worde. Im Januar 2019 hed er denn d Mundart Giele zäme mit em Gitarrist Roli gründet. Die hüt 5-chöpfig Bänd isch mit viele alte und neue Songs vom Sven vor allem i de Innerschwiiz underwägs.

Roli

… hed Rock ‘n’ Roll im Bluet

Er isch scho i sinere Chindheit vo sine Eltere und siner Umwelt mit Elvis und Johnny Cash gimpft worde. Spöter sind no d Stones, Hendrix und villi anderi dezue cho us de guete alte und neue Ziite! So isch de Sprung zum selber Musig mache ned wiit gsi.

Früehner hed er churz mit Bass agfange, hed denn aber schnell uf Akustik- und E-Gitarre gwächslet.

Mehreri Johr isch er mit chlinere Projekt underwägs gsi und jetzt, «Freude herrscht», mit de Mundart Giele.

Sis Ziel isch es, no lang Musig z mache und de Bluespunkrockjazzpop i sich z gspüre und z läbe.

Dani

…liebt de Blues Rock mit ere zünftige Prise Hard Rock us de 70er und 80er Johr.

Sit siner Schuelzeit wird grockt. Noch em Abgang us ere Hard Rock Cover Band isch er jetzt uf sinere musikalische Reis bi de Mundart Giele achoh. De Dani isch üse «jüngschti» Zuegang.

Über d Johr hed sich bi ihm e schöni Sammlig a coole Gitarre, Verstärcher und Effektgrät agsammlt. Er liebt Musig mit ere starche Gitarre im Vordergrund. Dezu gehöred Gary Moore, Stevie Ray Vaughn und natürli de Jimi Hendrix und vieli anderi au no…

Stefan

«Ich bin der Bassist hier – weil das basst zu mir»

De Stefan hed scho früeh mit Musig agfange. Noch Klarinette isch s Barisax cho. Mit dem hed er zerscht i de Jungmusig, denn inere Dixieland Band und au i Musiggsellschafte gspillt. Irgend einisch isch denn en Bassgitarre cho, für meh Bode i de Dixieland Band. Und spöter isch denn au no Rockmusig dezue cho und de Bass isch immer wichtiger wurde. Do i de Band isch de Stefan au verantworlich, dass d Songs aständig dokumentiert sind, damit si au immer öppe wieder glich töned.

… und ja, Tonmeister isch er au no, denn er chan s digitale Mischpult fascht fehlerfrei bediene. Er nimmt d Probe uf und mischt Dehei d Spuure zäme, damit au di andere chönd lose, a was mer nochli schaffe sett. Will er gern Musig macht, isch er momentan grad mit drüne Bänds im Proberuum und ab und zue au underwägs aztreffe.

I de musigfreie Ziit gnüsst de Stefan au no de Sound vo sinere Harley und sine beide Luusbuebetöff vo KTM.

Gregory

…isch de Drömmer und gid gern de Takt ah.

Als Teenager hed er d Freud am Schlagzüg spiele übercho und isch vo 2003 bis 2009 id Musigschuel. Zäme mit sim Schlagzüglehrer hed er a verschidene Drum-Uffüehrige mitgmacht.

Und sid em Oktober 2019 isch au er en «Mundart Giel».